Rustam Azimov: O‘zbekiston 60 mlrd dollarlik loyihalarni amalga oshiradi

O‘zbekistonda islohot dasturlari doirasida kelasi besh yil ichida jami qiymati 60 milliard dollarlik 900 dan ziyod investitsiya loyihalarini amalga oshirish ko‘zda tutilgan. Bu haqda 15-dekabr kuni O‘zbekiston bosh vaziri birinchi o‘rinbosari va moliya vaziri Rustam Azimov Chjenchjou shahridagi Shanxay hamkorlik tashkilotiga a’zo mamlakatlar hukumat rahbarlari kengashi majlisida aytib o‘tdi, deb yozadi UzDaily.

Foto: UzDaily

“Joriy yilda O‘zbekiston Respublikasi Prezidenti Islom Karimov ‘2015—2019-yillar uchun islohotlar, tuzilmaviy o‘zgarishlar va iqtisodiy diversifikatsiyani amalga oshirish dasturi’ni tasdiqladi, u O‘zbekiston iqtisodiyotining barqaror taraqqiyoti uchun ishonchli poydevor quradigan yettita strategik dasturdan iborat”, — dedi Rustam Azimov.
Vazirning ta’kidlashicha, ushbu dasturlar ishbilarmonlik muhitini yaxshilash, davlat mulkini xususiylashtirish, xususiy sektorni kengaytirish va davlatning iqtisodiyotdagi hissasini kamaytirish, sanoat va qishloq xo‘jaligini modernizatsiya qilish va diversifikatsiyalashga yo‘naltirilgan.
O‘zbekistonda kelasi besh yil davomida islohotlar dasturlarini amalga oshirish doirasida yangi yuqori texnologiyali ishlab chiqarishlar yaratish, neft-kimyo, kimyo sanoati, elektr energetikasi, mashinasozlik, avtomobil, to‘qimachilik, farmatsevtika sanoati va boshqa sohalardagi mavjud korxonalarni tubdan modernizatsiya qilish bo‘yicha jami 60 milliard dollarlik 900 dan ortiq investitsiya loyihalarini amalga oshirish ko‘zda tutilgan.
Batafsil | Подробно | Read more... Daryo