Зимбабве президенти мамлакатни Худонинг хоҳиш-иродасига мувофиқ бошқараётганини маълум қилди

Жаҳондаги энг кекса давлат раҳбари, 91 ёшли Зимбабве президенти Роберт Мугабенинг фикрича, у Худонинг хоҳиш-иродасига мувофиқ 35 йилдан бери Зимбабвени бошқариб келмоқда. Бу ҳақда «ТАСС» хабар бермоқда .

Фото: Getty Images

«Мана, менга қаранг. 91 ёшдаман ва тез орада 92 га тўламан. Ҳаммасини Худо ҳал қилади. Кимдир узоқ яшайди, биров эса ёшлигида ўлиб кетади», — деди Мугабе.
Таҳлилчилар сўнгги ойларда Мугабенинг саломатлиги сезиларли ёмонлашганини қайд этмоқда. Бу эса ҳокимият учун яширин курашни кескинлаштирмоқда. Мугабе ўрнига энг асосий даъвогар сифатида биринчи вице-президент Эммерсон Мнангагва ва Мугабенинг турмуш ўртоғи Грейс Мугабе кўрилмоқда.
Ўтган ҳафта Грейс кутилмаганда эрининг кетиши ҳақида гапириб қолди. «Вақти келиб, президент Мугабе кетади. Сиз бундан афсусланасиз ва у яна сиз билан бўлишини хоҳлаб қоласиз», — деди Мугабе хоним.
Мнангагва ҳам Мугабе албатта кетиши ҳақида фикр билдирди. «Биз уни соғинамиз. У буюк етакчи ва инсон. Янги авлод вакиллари орасидан унингдек раҳбар чиқади, деб ўйламайман. Бироқ у билан узоқ вақт бирга ишлаган, пишиб етилган кадрлар бор. Улар бармоқ билан санарли ва улар даража жиҳатдан барибир президентдан паст», — деди у.
Ўз вақтида Мугабе 100 ёшгача Зимбабвега президентлик қилмоқчи эканлигини маълум қилганди. Мамлакатнинг янги конституциясига мувофиқ, президентлик ваколати иккита беш йиллик муддат билан чекланган бўлиб, Мугабе кўпи билан 99 ёшига қадар президент бўлиши мумкин.
Batafsil | Подробно | Read more... Daryo