BMT: 2015-yilda dunyo bo‘yicha qochoqlarning umumiy soni 60 million kishidan oshishi mumkin

2015-yilda dunyo bo‘yicha qochoqlarning umumiy soni 60 million kishidan oshishi mumkin. Bu haqda BMT qochoqlar ishi bo‘yicha oliy komissari boshqarmasining 18-dekabr, juma kuni chop etilgan va joriy yil olti oyidagi holat qamrab olingan ma’ruzasida ma’lum qilingan, deya xabar beradi “RIA Novosti”.

Foto: “RIA Novosti”

Ma’ruzaga ko‘ra, 2015-yil 6 oyi mobaynida 1992-yildan beri birinchi marta dunyodagi qochoqlar soni 20 million kishidan oshdi (20,2 million). Bu o‘tgan yilning shu davriga nisbatan deyarli bir millionga ko‘p.
“2015-yilda zo‘ravonlik tufayli ko‘chib o‘tishga majbur bo‘lganlar soni ilk bor 60 million kishidan oshishi mumkin. Bugungi kunda dunyodagi har 122 kishidan biri o‘z uyini ilojsizlik tufayli tark etgan”, — deya ta’kidlanadi hujjatda.
BMT qochoqlar ishi bo‘yicha agentligi ma’lumotlariga ko‘ra, joriy yil 6 oyi mobaynida eng ko‘p qochoqlarni Turkiya (1,84 million kishi), mamlakat aholisiga nisbatan olganda esa Livan (1000 nafar fuqaroga 209 nafar qochoq) qabul qilgan.
Yevropa davlatlari orasida bu borada Germaniya yetakchilik qilmoqda: 6 oy mobaynida mamlakat 159 ming kishini qabul qilgan, bu deyarli o‘tgan yilgi ko‘rsatkich bilan teng. Ikkinchi o‘rinda Rossiya qayd etilgan —100 ming qochoq. Ular asosan Ukrainadagi mojaro tufayli uyini tark etganlardan iborat.
Batafsil | Подробно | Read more... Daryo