Nigeriyada 60 dan ortiq askarga chiqarilgan o‘lim hukmi bekor qilindi

Nigeriya harbiy qo‘mondonligi 60 dan ziyod askarga chiqarilgan o‘lim hukmini bekor qildi. 2014-yili 72 nafar nigeriyalik harbiy xizmatchi isyon va komandir hayotiga suiqasdda ayblanib, o‘lim jazosiga hukm qilingandi. Armiya shtabi boshlig‘i Tukur Buratay oliy jazoni 10 yil ozodlikdan mahrum etish bilan almashtirish to‘g‘risida ko‘rsatma berdi, deya xabar beradi “Korrespondent.net”.

Foto: “Korrespondent.net”

2015-yil bahorida ikki harbiy tribunal mamlakat shimoli-sharqida “Boko Haram” jangarilariga qarshi harbiy harakatlar chog‘ida intizomni buzganlikda ayblangan salkam 600 nafar harbiy xizmatchiga oid ishlarni ko‘rib chiqishni boshladi. Ulardan ayrimlariga isyon uyushtirganlik aybi qo‘yildi.
Ayblanuvchilarning advokatlarining bildirishicha, armiya zobitlari qurol-yarog‘ va jihozlar olish uchun mo‘ljallangan pullarni o‘zlashtirgan, askarlar esa bunga norozilik sifatida janglarda qatnashishdan bosh tortgan.
Batafsil | Подробно | Read more... Daryo