GM Powertrain Uzbekistan qo‘shma korxonasi ishchilari atrof-muhit muhofazasi bo‘yicha tadbir o‘tkazdi

General Motors Powertrain Uzbekistan qo‘shma korxonasi ishchilari zavod yaqinida joylashgan 237-maktabda ekologiya va atrof-muhit muhofazasiga bag‘ishlangan maxsus tadbir tashkil etdi. Maktab o‘quvchilari bilan uchrashuv kompaniyaning ijtimoiy mas’ullikka yo‘naltirilgan loyihasi doirasida o‘tkazildi. Bu haqda “O‘zavtosanoat” AK matbuot xizmati xabar bermoqda .

Foto: UzDaily

Tadbirda o‘quvchilarga General Motors kompaniyasining rivojlanish tarixi hamda atrof-muhit muhofazasi bo‘yicha taqdimotlar namoyish etildi. Kompaniyaning ekologiya va atrof-muhit bo‘yicha menejeri Ozoda Ismailova bolalar bilan birgalikda havoning ifloslanishi, biologik xilma-xillikni asrash, chiqindilarni utilizatsiya qilish kabi global muammolarni muhokama qilish bilan birga atrof-muhit muhofazasi bo‘yicha General Motors Powertrain Uzbekistan qo‘shma korxonasi amalga oshirayotgan ishlar haqida hikoya qilib berdi.
“Maktab o‘quvchilari bilan qizg‘in suhbat tarzida o‘tkazilgan tadbirda bolajonlar kompaniya va uning tizimida atrof-muhit muhofazasi bo‘yicha o‘zlarini qiziqtirgan ko‘plab savollarga javob oldi. Tadbir so‘ngida korxona ishchilari ishlab chiqarishdan ortib qolgan materiallardan tayyorlangan qush uyalarini bolajonlar o‘zlari o‘rnatishlari uchun ularga taqdim etdi”, — deyiladi “O‘zavtosanoat” matbuot xizmati xabarida.
Batafsil | Подробно | Read more... Daryo