Davlat bojxona qo‘mitasi pirotexnika vositalarining respublika hududiga olib kirilishiga qarshi kurashmoqda

Pirotexnika vositalarini respublika hududiga qonunga xilof ravishda olib kirish, sotish, saqlash va ulardan foydalanishning oldini olish borasida Qoraqalpog‘iston Respublikasi bojxona boshqarmasi xodimlari tomonidan huquqni muhofaza qiluvchi boshqa idoralar xodimlari bilan hamkorlikda olib borilgan tezkor tadbirlar davomida yil boshidan buyon 18 ta bojxona qonunbuzilish holati aniqlanib, jami 36,6 million so‘mlik 30,7 ming dona pirotexnika vositasi ashyoviy dalil tariqasida olib qo‘yildi. Bu haqda qo‘mita matbuot xizmati xabar beradi.

Foto: Davlat Bojxona qo‘mitasi

Jumladan, joriy yilning 11-dekabr kuni Qoraqalpog‘iston Respublikasi bojxona boshqarmasi xodimlari tomonidan olingan tezkor ma’lumotlar asosida fuqaro A.Qutlimuratovga (ismi-shariflar o‘zgartirilgan) tegishli garaj xolislar ishtirokida ko‘zdan kechirilganida, u yerda qiymati 23,5 million so‘mlik og‘irligi 56 kilogrammdan ortiq 5526 dona pirotexnika vositasi hech qanday hujjatlarsiz saqlanayotganligi aniqlandi. Mazkur holat yuzasidan jinoyat ishi qo‘zg‘atilib, tergov harakatlari olib borilmoqda.
Shuningdek, 2015-yilning 22-dekabr kuni Qoraqalpog‘iston Respublikasi bojxona boshqarmasi xodimlari tomonidan o‘tkazilgan tezkor tadbir natijasida, “Olmaota—Nukus” yo‘lovchi poyezdining yo‘lovchisi, qo‘shni davlat fuqarosi M.Alimjonov bojxona ko‘rigidan omon-eson o‘tib olish va pirotexnika vositalarini sheriklariga qulay tarzda yetkazish maqsadida qiymati 10 million so‘mlik 19,5 kilogramm og‘irlikdagi 25 ming dona pirotexnika vositasini Nukus shahri hududida vagondan uloqtirib yuboradi.
Hozirda ushbu holat yuzasidan bojxona tekshiruvlari va surishtiruv harakatlari davom ettirilmoqda.
Batafsil | Подробно | Read more... Daryo