Ўзбекистон халқ артистлари Эркин Комилов ва Ёдгор Саъдиев Тошкент шаҳридаги Инҳа университетида меҳмон бўлди

Тошкент шаҳридаги Инҳа университетида Ўзбекистоннинг Мустақиллик байрамига бағишлаб, «Бетакроримсан, ягонасан, она Ватаним — Ўзбекистоним!» шиори остида тадбир ўтказилди, дея хабар бермоқда университет матбуот хизмати.

Фото: Тошкентдаги Инҳа университети

Университет ректори Ш.Шерматов тадбирда сўзга чиқиб, жорий йилнинг 17 июль куни Ўзбекистон Президенти Ислом Каримов мамлакат мустақиллигининг 24 йиллик байрамига тайёргарлик кўриш ва уни ўтказиш тўғрисидаги қарори доирасида таълим масканида ҳам чора-тадбирлар дастури ишлаб чиқилганлиги ҳамда мазкур йўналишда қатор ишлар қилинганлигини қайд этиб ўтди. Жумладан, ўтган йили ўзининг 100 йиллигини нишонлаган Ўзбек миллий академик драма театри жамоасининг таниқли санъаткорлари, Ўзбекистон халқ артистлари Эркин Комилов ва Ёдгор Саъдиев билан уюштирилаётган ижодий кеча ҳам мазкур дастурнинг ажралмас қисми эканлигини яна бир бор эслатиб ўтди.
Ўзбекистон халқ артистлари Эркин Комилов ҳамда Ёдгор Саъдиев ўз маърузаларида ҳозирда маънавий ҳаётни юксалтириш йўлида бошқалар ҳавас қиладиган қандай натижаларга эришган бўлсак, ҳеч шубҳасиз, бу борада театр санъати, хусусан, Ўзбек Миллий академик драма театрининг ҳам муносиб ҳиссаси борлигини таъкидлади.
Даврани янада қизиқтириш мақсадида актёрлар анжуман тингловчиларига ўзларининг ҳаёти ва ижодлари тўғрисида сўзлаб берди. Маъруза якунида улар анжуман иштирокчиларини қизиқтирган барча саволларига атрофлича жавоб берди.
Тадбир якунида Тошкент шаҳридаги Инҳа университети томонидан Ўзбек миллий академик драма театри актёрлари, Ўзбекистон халқ артистлари Э.Комиловга ва Ё.Саъдиевга ўзларининг қимматли вақтларини аямай, илм даргоҳига ташриф буюргани учун миннатдорчилик билдирилиб, эсдалик совғалари топширилди.
Batafsil | Подробно | Read more... Daryo