Tehronda namoyishchilar Saudiya elchixonasiga bostirib kirdi

Eron poytaxti Tehronda namoyishchilar to‘dasi 3-yanvar, yakshanbaga o‘tar kechasi Saudiya Arabistoni elchixonasiga bostirib kirdi, deya xabar bermoqda Reuters.

Foto: “Kp.ru”

Saudiya hukumati shialar xatibi Nimr an-Nimrni qatl qilgani ma’lum bo‘lganidan so‘ng, namoyishchilar diplomatik missiya hududiga kirib olib, jihozlarni sindirdi va o‘t qo‘yishga urindi.
Politsiya olomonni elchixonadan siqib chiqardi, o‘t o‘chiruvchilar yong‘in o‘choqlarini o‘chirdi. Eron ichki ishlar vazirligi xotirjamlikka chaqirdi va muassasaning diplomatik maqomini hurmat qilishga da’vat etdi.
“RIA Novosti” xabariga ko‘ra, Mashhadda ham Saudiya Arabistoni konsulligi namoyishchilar hujumiga uchragan.
Eslatib o‘tamiz, 2-yanvar kuni Saudiya Arabistoni tashqi ishlar vazirligi terrorizm va fitna uchun sudlangan 47 kishiga nisbatan o‘lim hukmi ijro etilganini e’lon qildi . Ular orasida “Al-Qoida”ning Saudiya Arabistonidagi guruhi yetakchilaridan biri Faris az-Zahroniy va shialar xatibi Nimr an-Nimr ham bo‘lgan.
Eron avvalroq shialar xatibining qatli “Saudiya Arabistoniga qimmatga tushishi”ni aytgan edi.
Shayx shialar azaldan diskriminatsiyadan shikoyat qilib kelgan qirollik sharqida 2011-yilda Ar-Riyodga qarshi bo‘lib o‘tgan ommaviy demokratik noroziliklarning faol tarafdori bo‘lgan. 2014-yilda oktabrida u o‘limga hukm qilingan.
Qatlga norozilik belgisi sifatida An-Nimrning vatani Bahrayndagi Ash-Sharqiya shahri aholisi namoyishga chiqdi. Politsiyachilar ko‘zni yoshlantiruvchi gazdan foydalanib, ularni tarqatib yubordi.
Keyinroq Bahrayn “zo‘ravonlik va ekstremizmga qarshi kurashda barcha zarur va uzil-kesil choralarni qo‘llayotgan Saudiya Arabistoni bilan hamjihat” ekanini bildirgan edi .
Batafsil | Подробно | Read more... Daryo