BMT: Saudiya Arabistonida o‘lim jazosiga nisbatan moratoriy qo‘llash lozim

BMT Inson huquqlari bo‘yicha oliy komissari Zayd Raad al-Husayn Saudiya Arabistoni hukumatini mamlakatda o‘lim jazosiga nisbatan moratoriy qo‘llashga chaqirdi. Bu haqda tarqatilgan bayonotga asosan “TASS” xabar qilmoqda .

Foto: EPA

“Qirollikda 47 kishiga, shu jumladan shia ulamosi Nimr an-Nimrga nisbatan chiqarilgan o‘lim hukmi ijro etilganligi to‘g‘risidagi xabarlardan chuqur taassufdaman”, ― deya ta’kidladi oliy komissar.
Al-Husayn 2015-yilda shayx Nimr an-Nimrga nisbatan o‘lim jazosi tayinlanganligi munosabat bilan Saudiya Arabistoni hukumatiga xat bilan murojaat qilganligini eslatib o‘tdi.
Shuningdek, bayon qilinishicha, xalqaro huquqqa asosan, qasddan sodir etilgan qotillik kabi eng og‘ir jinoyatlar uchungina o‘lim jazosini qo‘llash mumkin. Bundan tashqari, ishni ko‘rib chiqishda adolatli sudlov jarayoni va oshkora sud majlisi kafolatlangan bo‘lishi lozim.
Al-Husayn Saudiya Arabistoni hukumatini barcha qo‘llanilgan o‘lim jazolariga nisbatan moratoriy joriy etishni hamda terrorizmga qarshi kurashishda muqobil strategiyalarni ishlab chiqishda BMT va boshqa hamkorlar bilan birgalikda ishlashga chaqirdi.
Eslatib o‘tamiz, Saudiya hukumati shialar xatibi Nimr an-Nimrni qatl qilgani ma’lum bo‘lganidan so‘ng, Tehronda namoyishchilar Saudiya Arabistoni elchixonasiga bostirib kirdi . Shundan keyin Saudiya Arabistoni Eron bilan diplomatik aloqalar uzilganini e’lon qildi .
Batafsil | Подробно | Read more... Daryo