Huawei kompaniyasi yangi smartfon, planshet va “aqlli” soatini taqdim etdi (foto)

Xitoyning Huawei kompaniyasi CES 2016 ko‘rgazmasida Huawei Mate 8 smartfoni, MediaPad M2 plansheti, yangi ranglardagi Huawei Watch “aqlli” soati va yangi dizayndagi Nexus 6P’ni taqdim etdi, deb yozadi “Hi-tech.mail.ru”.
Huawei Mate 8 smartfoni

Foto: “Hi-tech.mail.ru”

Huawei Mate 8 biznesmenlar uchun imidj smartfoni sifatida ta’riflandi. U 6 dyuymli ekran, HiSilicon Kirin 950 protsessori, 4000 mA/s sig‘imli akkumulyator, 16 megapikselli Sony IMX 298 kamerasi (asosiy) va 8 megapikselli old kameraga ega bo‘ldi.
Qurilmaning orqa paneliga barmoq izi skaneri joylashgan, u Mate 7 smartfonidagi datchikdan ikki marta tezroq ishlaydi. Skaner foto, video va hujjatlarni “qulflash”, kamerani ishga tushirish, qo‘ng‘iroqqa javob berish, budilnikni o‘chirish uchun ham qo‘llanilishi mumkin.
Smartfonning 3 Gb tezkor va 32 Gb ichki xotiraga ega versiyasi 599 yevro, 4 Gb tezkor va 64 Gb ichki xotiralisi esa 699 yevro turadi.
MediaPad M2 plansheti

Foto: “Hi-tech.mail.ru”

To‘rtta dinamikka ega yangi Huawei plansheti multimedia va mobil o‘yinlar ishqibozlari uchun qiziq bo‘lgan qurilmadir.
Planshetning 2 Gb tezkor va 16 Gb ichki xotiraga ega versiyasi 349 dollar, 3 Gb tezkor va 64 Gb ichki xotiralisi 469 dollarga tushadi.
Yangilangan Huawei Watch

Foto: “Hi-tech.mail.ru”

Bu safar aksessuarning ko‘k — Jewel va oq — Elegant variantlari namoyish etildi. Gadjetlar ichki dinamikka va kiruvchi qo‘ng‘iroqlarga javob berish funksiyasiga ega — Bu Android Wear asosidagi shunday funksiyaga ega birinchi soat.
Huawei Watch Jewel’ning narxi 599 dollar, Huawei Watch Elegant — 499 dollar.
Oxirida Huawei avvalroq taqdim etilgan Nexus 6P’ni namoyish qildi, endi u xira tillarang, oq, qora va kumushrang tuslarda chiqarildi.

Foto: “Hi-tech.mail.ru”


Batafsil | Подробно | Read more... Daryo