Ruminiya sobiq prezidentining ukasi korrupsiya bo‘yicha hibsga olindi

Ruminiyaning Konstansa shahar tribunali tomonidan mamlakatning sobiq prezidenti Trayan Beseskuning ukasi Mircha Besesku korrupsiya va obro‘-e’tiboridan foydalanib daromad ko‘rganlikda ayblanib, to‘rt yil qamoq jazosiga hukm qilindi. Bu haqda “Korrespondent.net” xabar qilmoqda .

Foto: “Noi.md”

Shuningdek, sud instansiyasi Mircha Besesku tomonidan pora tariqasida olingan 265 ming yevro miqdoridagi pul mablag‘ini davlatning foydasiga musodara qildi. Bundan tashqari, uning shaxsiy mol-mulkiga qo‘yilgan xatlovni hozircha olib tashlamaslikka qaror qilindi.
Ma’lum qilinishicha, mazkur jinoyat ishi bo‘yicha pora olishda vositachilik qilgan Beseskuning do‘sti, tadbirkor Marian Kepetsyne ham ayblandi.
Sudning hukmiga ko‘ra, ikkala ayblanuvchiga ham jazoni o‘tab bo‘lgandan keyin, ikki yil davomida rasmiy lavozimlarni egallash taqiqlandi.
Ruminiya sobiq prezidenti Trayan Besesku sudning qarorini “og‘ir” deb topib, ukasini instansiyaning qaroriga bo‘ysunishga va hukm ustidan amaldagi qonunchilikka muvofiq shikoyat qilishga chaqirdi.
Eslatib o‘tamiz, Ruminiyada qirollik oilasi a’zosi shahzoda Paul korrupsiyada gumon qilinib, qo‘lga olingan edi .
Batafsil | Подробно | Read more... Daryo