Gruziyalik ayol Turkiyada topilgan van Deykning 14 mln dollarlik kartinasi uniki ekanligini da’vo qilmoqda

Tbilisida yashovchi Eka Abashidze shu kunlarda Istanbulda topilgan gollandiyalik mashhur rassom Antonis van Deykning kartinasi bir necha yillar davomida uning oilasi mulki bo‘lganligini ta’kidlamoqda. Bu haqda “TASS” xabar beradi .

Foto: “Telegraf”

Abashidzening jurnalistlarga ma’lum qilishicha, uning oilasi kartinaning muallifi van Deyk ekanligini bilmagan. Hozirgi paytda surat 14 million dollarga baholanmoqda.
Eka Abashidzening so‘zlariga qaraganda, besh yil avval uning oilasi kartinani u uchun 37 ming dollar to‘lashga va’da bergan ikki kishiga sotgan. Ular yetti ming dollarni berib, pulning qolgan qismini keyinroq berishini ma’lum qilgan. Aldanganini tushunib yetgan Abashidzening oilasi mahalliy sudga murojaat qilgan va sud jarayonini yutib chiqqan.
Endilikda ayol kartinani uning oilasiga qaytarilishini talab qilmoqda.
Kuni kecha Turkiya OAVlari Istanbulda Gruziyadan kontrabanda yo‘li bilan olib chiqilgan van Deykning kartinasi topilganligini ma’lum qilgan edi. Uni noqonuniy sotishga uringan ikki tadbirkor politsiya tomonidan qo‘lga olingan.
Batafsil | Подробно | Read more... Daryo