Abdumo‘min O‘tbosarov farzandlarining to‘yida boshlovchilik qilish niyatida edi

O‘zbekiston xalq artisti, marhum suxandon Abdumo‘min O‘tbosarov o‘z farzandlarining to‘ylarida boshlovchilik qilish orzusida edi. Bu haqda O‘zMTRKning taniqli suxandonlari Namuna Zohirova va Surayyo Ermatova “Daryo” nashriga bergan intervyusida ta’kidlab o‘tdi.

Abdumo‘min O‘tbosarov hamkasblari davrasida. Foto: Surayyo Ermatova va Namuna Zohirova shaxsiy arxividan

“Abdumo‘min akaning ikki o‘g‘li bor. ‘Xudo xohlasa, o‘g‘limning to‘yida o‘zim boshlovchilik qilaman’, — deb niyat qilgan ekanlar”, — deydi Namuna Zohirova. Surayyo Ermatovaning so‘zlariga ko‘ra, Abdumo‘min O‘tbosarov farzandlarining to‘yi hammanikidan boshqacha bo‘lishini istagan, hatto maxsus ssenariylar ham tayyorlab qo‘ygan, bu haqda o‘z yaqinlariga, hamkasblariga faxrlanib so‘zlab berardi.
“Abdumo‘min aka qo‘li gul inson edi. Uydagi mayda-chuyda nosozliklarni, maishiy texnikalarni tuzatish u kishiga cho‘t emasdi. Hovlisi qurilayotganida, har bir xonasi bitganida, suratlarini bizga ko‘rsatardi: ‘Mana bu yerini o‘zim qildim, bu yerida esa ustalar ishladi’, — deb. Yaqinlaridan ko‘ngil so‘rab uyiga borganimizda, bu uyga xuddi avval ham kelgandek bo‘ldim, chunki Abdumo‘min aka bizga bu uydagi barcha xonalarni qurilgan vaqtida faxrlanib, xursandchilik bilan ko‘rsatib bo‘lgandi”, — dedi Namuna Zohirova.

Namuna Zohirova va Surayyo Ermatova. Foto: “Daryo”

Abdumo‘min O‘tbosarovning kutilmagan o‘limi uning hamkasblarini karaxt ahvolga solib qo‘ydi. U rahbarlik qilgan jamoa a’zolari hali ham bo‘lgan voqeaga ishona olmayapti, nima bo‘lganiga tushunmayapti.
“Rahmatilla Mirzayevning o‘limi bir katta zarba bo‘lgandi. Abdumo‘min akaning kasalxonaga olib ketishibdi, deyishganida ham bu xabarni xotirjam qabul qilgandik. Axir issiq jon, tobi qochgan bo‘lishi mumkin, yaxshi bo‘lib ketadi, deb o‘ylagandek. Vafot etishi mumkinligi xayolimizga ham kelmagan edi. O‘ylashimcha, Abdumo‘min aka hammamizga o‘lim haq ekanligini isbotlab ketdi”, — dedi Namuna Zohirova.
Eslatib o‘tamiz, Abdumo‘min O‘tbosarovning hayotdan ko‘z yumgani 2016-yil 1-yanvarda ma’lum bo‘ldi . Uning o‘limiga yurak xuruji sabab bo‘lgan .


Go‘zal O‘tbosarova: Abdumo‘min akani tongda ishga kuzatganimcha, qaytib ko‘rmadim



Batafsil | Подробно | Read more... Daryo