Chevrolet odamlarning haqiqiy munosabatini bilish uchun Malibu’dan o‘z logotipini olib tashladi

Chevrolet kompaniyasi McCann agentligi bilan hamkorlikda “Aktyorlar emas, haqiqiy odamlar” seriyasidagi navbatdagi reklama mahsulotini omma e’tiboriga havola qildi. Rolikda yangilangan Chevrolet Malibu avtomobilidan barcha brending belgilari olib tashlanib, odamlarning bu mashina haqidagi fikrlari so‘ralgan, deya xabar bermoqda “vc.ru”.

Kadr: YouTube

Reklama roligida Chevrolet vakili yig‘ilganlarga ularning qarshisida turgan avtomobilning u yoki bu modelga taalluqli ekanini bildiruvchi barcha belgilar olib tashlanganini ma’lum qilib, avtomobil haqidagi fikrlarini so‘ragan. Tajribaning ba’zi qatnashuvchilari oldida Lexus turibdi, deb o‘ylagan, boshqalari Acura, yana bir qator kishilar BMW deb taxmin qilgan.

Odamlar mashina imkoniyatlari bilan tanishgan — unda iPhone smartfonidan salon ichida xavfsiz foydalanish imkonini beruvchi Apple CarPlay tizimi, Teen Driver texnologiyasi (o‘smir haydovchi avtomobilni boshqarayotgan vaqtda, uning harakati haqidagi axborot ota-onasiga uzatib turiladi) mavjud.
Shundan so‘ng, Chevrolet vakili yig‘ilganlardan mazkur avtomobil taxminan necha pul turishi haqida so‘ragan. Tajriba qatnashchilari 50—80 ming dollar oralig‘idagi narxlarni aytib o‘tgan.
Savol-javoblar oxirida odamlar avtomobil haqidagi haqqoniy axborotni oladi. Ularning qarshisida Chevrolet modeli turgani, uning minimal narxi 22,5 ming dollar ekaniga aksariyat qatnashchilar hayron qolgan.
Adweek nashri mualliflarining fikricha , mazkur reklama roligining qadri shundaki, kompaniya o‘z avtomobiliga nisbatan odamlarning haqiqiy munosabatini ochib bera olgan. “Aktyorlar emas, haqiqiy odamlar” reklama kampaniyasidan ko‘zlangan asosiy maqsad — har oy davomida avtomobillarning chakana savdosi hajmini oshirishdir.
Mazkur reklama kampaniyasi doirasida tayyorlangan boshqa roliklar bilan quyida tanishish mumkin.






Batafsil | Подробно | Read more... Daryo