“Muzeylar haftaligi” doirasida O‘zbekiston muzeylari aholiga bepul xizmat ko‘rsatadi

Madaniyat va sport ishlari vazirligi tomonidan O‘zbekiston davlat san’at muzeyida “Betakrorimsan, yagonasan ona Vatanim – O‘zbekistonim!” shiori ostida 2—8-sentabr kunlari o‘tkaziladigan “Muzeylar haftaligi”ning tantanali ochilishi marosimi bo‘ldi. Bu haqda vazirlik rasmiy sayti xabar bermoqda .

Foto: mcs.uz

O‘zbekiston Respublikasi Vazirlar Mahkamasining 2014-yil 11-iyulda “Davlat muzeylarining bolalar va ularning ota-onalariga ochiqligini ta’minlash chora-tadbirlari to‘g‘risida”gi 189-conli qarori bilan O‘zbekistondagi idoraviy bo‘ysunishidan qat’iy nazar barcha davlat muzeylarining bolalar va ularning ota-onalariga ochiqligini ta’minlash maqsadida davlat muzeylariga 18 yoshgacha bo‘lgan bolalarga haftaning har seshanba va juma kunlari, barcha aholiga har yili 2—8-sentabr kunlari o‘tkaziladigan “Muzeylar haftaligi” doirasida bepul kirish tartibi joriy etildi.
“Muzeylar haftaligi” davomida respublikadagi 41 ta muzeyda jami 190 dan ortiq madaniy-ma’rifiy tadbirlar, “Mahorat darslari”, viktorinalar, uchrashuvlar hamda musiqiy dasturlar o‘tkazilishi rejalashtirilgan.

Sayyohlarning tashrifi ortganligi munosabati bilan yozgi-kuzgi mavsumda respublikadagi barcha muzeylarning ish vaqti 18.00 dan 21.00 ga qadar uzaytirilgan. Aynan “Muzeylar haftaligi” tadbirlari doirasida ham muzeylar kech soat 21.00 ga qadar aholiga bepul xizmat ko‘rsatadi.


Batafsil | Подробно | Read more... Daryo