Indoneziyadagi teraktlar tashkilotchisi IShIDning mintaqadagi qanoti yetakchiligiga da’vo qilgan

Jakarta politsiyasi rahbari Tito Karnavian Indoneziya poytaxtidagi teraktlar tashkilotchisi ekanligi aytilayotgan Bahrun Naim shaxsi haqida qo‘shimcha tafsilotlarni ma’lum qildi. Bu haqda “TASS” xabar bermoqda .

Foto: EPA

Ta’kidlanishicha, Markaziy Yava viloyatidagi internet-kafening sobiq egasi bo‘lgan Bahrun Naim 2011-yil iyunida noqonuniy qurol saqlash va favqulodda holat tartibini buzishda ayblanib, 2,5 yillik qamoq jazosiga hukm qilingan. Maxsus xizmatlar ma’lumotiga ko‘ra, ozodlikka chiqqandan so‘ng Naim mamlakatni tark etib, Suriyaga ketgan. Uning ayni paytda Rakka hududida ekanligi va IShID safida jang qilayotgani bildirilgan.
“Naim IShIDning janubi-sharqiy Osiyodagi mintaqaviy qanoti yetakchisi bo‘lmoqchi. Ammo bunga boshqa nomzodlar ham bor. Indoneziyada uyushtirilgan hujum Naimning yetakchilikka da’vosini isbotlashi lozim bo‘lgan”, — deya ta’kidlagan Karnavian.
Politsiya rahbari Jakartada teraktlarni uyushtirgan besh nafar terrorchi ham Indoneziya fuqarosi ekanligini tasdiqladi.
Batafsil | Подробно | Read more... Daryo