O‘zbekistonlik shaxmatchi Marat Jumayev Chennai Open turnirida bir kunda bir g‘alaba va bir durangga erishdi

Hindistonning Chennay shahrida shaxmat bo‘yicha an’anaviy xalqaro turnirda 21-yanvar kuni bir yo‘la ikkita tur uchrashuvlari o‘tkazildi, deb xabar beradi “Olamsport”.

Foto: “Olamsport”

Musobaqada 14-raqam ostida tasniflangan o‘zbekistonlik grossmeyster Marat Jumayev avvaliga qora donalarda turnirning birinchi raqamli shaxmatchisi rossiyalik Boris Grachev bilan durang o‘ynadi. Keyin esa oq donalarda hindistonlik shaxmatchi Kumar Vinotni mag‘lubiyatga uchratdi.
Oltita uchrashuvda to‘rtta g‘alaba va ikkita durang qayd etgan Marat Jumayev 5 ochko bilan turnir jadvalida qo‘shimcha ko‘rsatkichlarga ko‘ra 9-o‘rinni egallab turibdi. Lekin birinchi o‘rindagi Yuriy Solodovnichenko hisobida ham aynan 5 ochko bor.
Bugun, 22-yanvar kuni Jumayev 7-tur uchrashuvida rossiyalik Anton Demchenko bilan bahs yuritadi. Demchenko 5 ochko bilan 8-pog‘onadan joy olgan.
O‘z tarixida sakkizinchi bor tashkil etilgan Chennai Open musobaqasida 11 davlatdan jami 213 shaxmatchi bosh mukofot uchun dona suryapti.
Eslatib o‘tamiz, Marat Jumayev 4-turda oq donalarda harakat qilib, mezbonlar vakili Shet Jaykumar Sammedni mag‘lubiyatga uchratgan edi .
Batafsil | Подробно | Read more... Daryo